Prefektja e qarkut të Beratit,Valbona Zylyftari, është infektuar me Coronavirus. Mësohet se prefektja Zylyftari kishte disa ditë që kishte shfaqur shenja të infektimit dhe ishte karantinuar në banesën e saj në Berat.
Zylyftari kishte bërë tamponin në privat dhe përgjigjia e tamponit rezultoi sot “pozitive”, ndërkohë që mësohet se ajo është në gjendje të mirë shëndetësore.
Covid-19 nuk ka të ndalur infektimet edhe në shkollat 9-vjeçare dhe të mesme të qarkut të Beratit, ku janë konfirmuar sot ‘pozitivë’, 1 punonjëse në Zyrën Vendore Arsimore Berat, 1 mësuese në shkollën ‘Ajet Xhindole’ dhe 1 nxënës në gjimnazin ‘Babë Dudë Karbunara’. Mes të infektuarve të sotëm janë edhe 2 kujdestare në Qendrën e Zhvillimit Rajonal ‘Lira’, qendër ku janë karantinuar prej 3-javësh i gjithë stafi i edukatoreve dhe 46 fëmijët me aftësi ndryshe.
Infektime janë regjistruar edhe sot brenda Spitalit Rajonal të Beratit, ku është konfirmuar ‘pozitive’ një sanitare në Maternitetin e Spitalit, ndërkohë që edhe një polic i Policisë Bashkiake Berat është konfirmuar i infektuar me Coronavirus. Ndërkohë që infektimet me Coronavirus kanë njohur rritje nga ditë në ditë gjatë muajit të fundit në qarkun e Beratit, numri i rasteve aktive ka arritur në 621.
