“Lëvizja Për Universitetin” njofton se ka mbyllur së fundmi një anketë online në lidhje me mësimin online dhe problematikat e tij. Nga përgjigjet, ka rezultuar që “një pjesë e konsiderueshme e studentëve kanë probleme me aksesin në internet dhe detyrohen të blejnë vazhdimisht paketa interneti të kushtueshme”.
Në kuadër të këtyre përgjigjeve dhe situatës problematike të mësimit online është nisur edhe një peticion për të mundësuar internetin falas për studentët.
Në peticionin drejtuar Ministrisë së Arsimit, Lëvizja Për Universitetin shprehet se, për aq kohë sa qeveria dhe ministria përkatëse kanë vendosur të mbyllin auditorët, u lind detyrimi t’i pajisin të gjithë studentët me bazën e nevojshme materiale për të ndjekur leksionet.
“Krahas haraçit absurd që duhet paguar çdo vit, barra ekonomike e internetit dhe pajisjeve teknologjike është pengesë e pakapërcyeshme për shumësinë studentore.Ne, studentët e universiteteve publike të Shqipërisë, kërkojmë pajisjen e menjëhershme të të gjithë studentëve me aparaturat teknologjike dhe sigurimin e paketave të internetit të mjaftueshme për ndjekjen e mësimit online. Diskriminimit ekonomik i duhet dhënë fund një orë e më parë”, thuhet më tej në peticionin që mund të firmoset online.
Sipas të dhënave, peticioni ka marrë deri tani mbi 1 900 firma.
