Një i ri është vënë në pranga pasi në banesën ku jetonte në Mirditë, është gjetur rreth 1 kg kanabis dhe një armë zjarri.
Policia njoftoi se, bazuar në informacionet e marra në rrugë operative se në fshatin Qafë Mollë, një person posedonte në banesë lëndë narkotike dhe armë zjarri pa leje, u organizua dhe finalizua operacioni policor i koduar “Diga”. Si rezultat, u bë kapja dhe arrestimi i shtetasit A. K., 26 vjeç, banues në fshatin Qafë Mollë, Mirditë.
Gjatë kontrollit të ushtruar në banesën e shtetasit A. K., shërbimet e Policisë kanë gjetur dhe sekuestruar në cilësinë e provës materiale rreth 1.2 kg lëndë të dyshuar kanabis sativa, një armë zjarri automatik dhe 42 fishekë.
Ndaj të riut janë ngritur akuzat për veprat penale “Prodhimi dhe shitja e narkotikëve” dhe “Armëmbajtja pa leje”.
