Nga BoldNews.al
Kryetari i Bashkisë së Divjakës, Fredi Kokoneshi, ka filluar para kohe fushatën elektorale. Siç ka ndodhur rëndom në të tilla fushata elektorale, apo zgjedhje qendrore apo lokale, shpërndarja e thasëve me miell, pakove ushqimore, ka sjellë mbledhjen e votave.
Dhe, s’kishte si të ndodhte ndryshe as në këto zgjedhje qendrore, pasi Bashkia e Divjakës, ku deputet i zonës është vetë zëvëndës kryeministri Erion Braçe, do të shpërndajë miell, fasule, oriz, makarona etj. “Bold News” ka siguruar dokumentet e një tenderi që po zhvillon Bashkia e Divjakës, e cila ka akorduar rreth 10 milionë lekë të vjetra për pako ushqimore.
Bashkia, sipas dokumentit të mësipërm, e ka kamufluar blerjen e pakove ushqimore me situatën e pandemisë Covid 19. Objekti i tenderit është “blerje produkte ushqimore dhe jo ushqimore për familjet në nevojë, në kuadër të masave të marra për ofrimin e asistencës dhe ndihmës ndaj shtresave në nevojë në kushtet e pandemisë së shkaktuar nga Covid 19″. Fondi është rreth 10 milionë, ndërsa nisur nga objekti i tenderit, synimi janë shtresat në nevojë. Këto shtresa janë përdorur gjithmonë për blerjen e votave, pasi, në kushte ekstreme varfërie, ata janë të detyruar që të shesin votat.
Duke synuar të varfrit, Braçe dhe Kokoneshi do të blejnë 6 mijë kilogramë miell, 1200 litra vaj, 960 kilogramë fasule, 480 kg vaj, sheqer dhe salcë. Pra, me produktet bazë të shportës, këta zyrtarë po synojnë që të mbledhin këto vota, duke përdorur varfërinë ekstreme të këtyre familjeve. Nisur dhe nga situata e Covid, zona e Divjakës është e verdhë, pasi shtrirja e zonës në një sipërfaqe të madhe dhe me ajër të pastër, nuk ka sjellë raste të shumta në këtë zonë.
