Në spitalet Covid në vend vijojnë rastet e pacientëve të cilët vetëvriten. Një tjetër pacient është hedhur nga spitali “Shefqet Ndroqi” pak pas mesnate, duke ndërruar jetë.
“Rreth orës 00:30, dyshohet se është vetëhedhur nga lartësia e një spitali shtetasi L.S.,60 vjeç, i cili për pasojë ka ndërruar jetë” njofton policia. Grupi hetimor dhe sherbimet e Policisë ndodhen në vendngjarje dhe vijojnë punën për zbardhjen e rrethanave të ngjarjes, shtuan të njëjtat burime.
Lidhur me rastin, reagoi dhe spitali “Shqfqet Ndroqi, ku ishte i shtruar pacienti.
Ky është rasti i 5-të i vetëvrasjes në spitalet Covid në kryeqytet brenda disa muajsh.
I pari është regjistruar më 13 gusht, ku 29-vjeçari Xhino Koça nga Durrësi u hodh nga kati i tretë i “Shefqet Ndroqit” dhe për pasojë ndërroi jetë. Në 2 shtator, Hasan Mira, 65 vjeç, i dha fund jetës duke u hedhur nga kati i katërt i “Covid 2” vetëm dy ditë pasi ishte shtruar aty. Rasti i tretë ishte ai i Preng Gjonajt, 52 vjeç, me origjinë nga Tropoja e me banim në Tiranë, i cili ndërmori aktin ekstrem në 1 nëntor, duke u hedhur nga “Sanatoriumi”. Në 10 Nëntor, një tjetër 69-vjeçar u vetëhodh nga spitali Covid-1, duke humbur jetën.
Për të gjitha rastet është njoftuar nisja e hetimeve, por deri më tani nuk ka pasur akuza të ngritura nga prokuroria.
Në një prononcim më herët gjatë muajit, psikologia Entela Binjaku tha për “BoldNews.al” se, “në kushtet e pandemisë, lodhja psikike, mosbesimi tek institucionet e kujdesit shëndetësor, frika prej të pakthyeshmes, historitë e mëparshme për jetë të humbura dhe izolimi prej çdo kontakti që jep besim, mbështetje apo komunikim të ngrohtë, e çojnë individin drejt humbjes së ekuilibrit mendor”. Në kushte të tilla, shtoi ajo, ai rrit prirjen për akte të tilla.
