Ridvan Ramazani, 43-vjeçari viktimë e vrasjes së ndodhur në Shkodër, është gjetur i pajetë në makinë.
Burime zyrtare nga policia njoftuan se rreth orës 11:20, në fshatin Mushan, në afërsi të një pike karburanti, 43-vjeçari është gjetur i pajetë në mjetin e tij tip “BMW” (në foto).
Ridvan Ramazani, banues në fshatin Darragjat, dyshohet se është ekzekutuar me armë zjarri teksa ndodhej brenda makinës.
“Grupi hetimor nën drejtimin e Prokurorisë po vijojnë punën për sqarimin e rrethanave të kësaj ngjarje, identifikimin dhe kapjen e autorit/ve. Në ndihmë të Policisë lokale janë nisur forcat e FNSh Shkodër dhe forcat Speciale Renea”, thuhet në njoftimin paraprak të policisë lidhur me rastin.
Sipas raportimeve mediatike, familja e viktimës ka qenë në konflikt me familjen e Edmir Koçisë. Ky i fundit është ekzekutuar ekzaktësisht 8 vite më parë – më 28 nëntor të vitit 2012, në derën e shtëpisë së tij, në lagjen “Tepe”.
Ndërsa në vitin 2008, është ekzekutuar edhe xhaxhai i 46-vjeçarit, Enver Hyseni (Ramazani). Ky i fundit, asokohe 50 vjeç, baba i tre fëmijëve, u vra teksa po drejtonte mjetin”Benz” ML në aksin rrugor Dajç-Darragjat. Autorët mbeten ende të panjohur.
Raportohet se Ridvan Ramazani ka qenë i dënuar në vitin 2017 për falsifikim dokumentesh.
