Për policinë e Elbasanit, aparatet “Play Station” janë … lojëra fati! Të paktën, kështu thuhet në një njoftim zyrtar nga zyra e shtypit pranë Drejtorisë Vendore të Policisë Elbasan.
Në njoftim, ku shkruhet se “vijojnë kontrollet e pandërprera në zbatim të planit të masave për evidentimin e ndëshkimin ligjor të veprimtarisë së kundraligjshme të lojërave të fatit”, sqarohet më tej se “specialistët për Hetimin e Krimit Ekonomik e Financiar në Drejtorinë Vendore të Policisë Elbasan, proceduan penalisht në gjendje të lirë shtetasin: A.N., 22 vjeç, banues në Librazhd, pasi gjatë kontrollit të ushtruar në ambientet e lokalit të tij, ushtronte aktivitet të lojrave ‘Play Station’ dhe në cilësinë e provës materiale u sekuestrua 7 aparate ‘Play Station’ dhe një televizor”.
Njoftimi duket si një paradoks. Është e vështirë në fakt të gjesh një lidhje midis një aparati “Play Station” dhe lojërave të fatit. Në të vërtetë, një “Play Station”, apo të ngjashëm me të, një “X Box”, “Nintendo”, etj, janë aparate përmes së cilave një apo më shumë persona zhvillojnë një lojë elektronike. Kurrsesi një aparat, apo platformë, përmes së cilës mund të vendosësh baste në mënyrë elektronike.
Megjithatë, thonë se gjërat jo gjithmonë janë siç duken, e ndoshta specialistët e Elbasanit, kanë zbuluar një funksion të jashtëligjshëm të këtyre pajisjeve që përdoren gjerësisht për argëtim…
