Detaje të reja nga ngjarja e djeshme e ndodhur në Elbasan ku mbeti i plagosur Elvis Koçi Çaushllari, i cili më pas u arrestua nga Policia.
Burime policore bëjnë me dije se në deklaratën e tij para oficerëve të Policisë, Çaushllari, i njohur dhe si “korçari” është shprehur se nuk ka konflikte me askënd.
Ai ka thënë se është sulmuar në mënyrë të papritur nga disa persona që nuk i njihte dhe i shihte për herë të parë.
Po sot, Policia e Elbasanit njoftoi arrestimin e një prej personave të përfshirë në ngjarje, ndërsa ka shpallur në kërkim një tjetër:
Në vijim të veprimeve për zbardhjen e ngjarjes së ndodhur mesditën e djeshme, në lagjen “Emin Matraxhiu”, Elbasan, ku gjatë një konflikti të çastit mes dy drejtues automjetesh u përdorën dhe armë zjarri, falë veprimeve të shpejta hetimore dhe profesionale u bë e mundur zbardhja e ngjarjes, vënia në pranga e njërit prej autorëve dhe shpallja në kërkim e një tjetër autori. Si rezultat i veprimeve hetimore të thelluara, nën drejtimin e Prokurorisë së Rrethit Gjyqësor Elbasan, nga specialistët për Hetimin e Krimit kundër Personit në Drejtorinë Vendore të Policisë Elbasan u arrestuan në flagrancë shtetasit:
F. F., 21 vjeç, banues në Elbasan, për veprat penale “Vrasje me dashje” e mbetur në tentativë e kryer në bashkëpunim dhe “Armëmbajtja pa leje”.
E. C., 21 vjeç, banues në Librazhd, për veprat penale “Veprime që pengojnë zbulimin e së vërtetës” dhe “Moskallëzim krimi”.
Gjithashtu, si rezultat i këtyre hetimeve është shpallur në kërkim policor, për veprat penale “Vrasje me dashje” e mbetur në tentativë, e kryer në bashkëpunim dhe “Armëmbajtja pa leje” shtetasi A. C., 21 vjeç, banues në Elbasan. Vijon puna për kapjen e tij dhe për kapjen e autorit tjetër, shtetasi M. Q.
