Armando Cungu dhe Laçi ndajnë rrugët. Klubi vendosi largimin e trajnerit pas humbjes me Kukësin, duke konfirmuar në fakt krizën që ekzistonte mes palëve.
Pozitat e drejtuesit të stolit u lëkundën prej barazimit me Kastriotin, por pas qetësimit të gjakrave, situata u stabilizua.
Megjithatë, humbja aksidentale me Kukësin u shoqërua me vendimin e paevitueshëm. Pasi ka ndërtuar një skuadër pretendente për titullin, presidenti Pashk Laska nuk mund të pranonte që Laçi të ketë vetëm tre pikë në katër javët e para.
Drejtuesit kurbinas po punojnë për trajnerin e ri, me Shpëtim Duron që shihet si tekniku i ri. Trajneri me eksperiencë dhe me një të kaluar të rëndësishme, mbi të gjitha te Partizani dhe Skënderbeu, ishte favorit edhe disa ditë më parë, kur largimi i Cungut dukej i sigurt.
Në orët në vijim klubi pritet të zyrtarizojë trajnerin e ri, edhe sepse koha nuk premton, pasi në fundjavë Laçin e pret sfida me Apoloninë.
