Gazetari Enkel Demi ka ironizuar mëngjesin e sotëm koncertin e dhënë një ditë më parë në spitalin “Shefqet Ndroqi”, atje ku kurohen pacientët e prekur nga Covid-19.
“Tani do të ndërpriten medikamentet dhe do përdoret kura e qeverisë, muzika. Dje shkoi Ansambli i Këngëve dhe Valleve Popullore dhe dha koncert në një spital, atje ku ka të sëmurë që duan qetësi. Nuk e di se kush është mendja perverse që organizoi një koncert të tillë, por me siguri ai mban në zyrë fotografinë e Gebelsit”, tha Demi në emisionin Abc e Mëngjesit.
Në vijim ai shtoi se në të njëjtin spital, nga të njëjtat ballkone ku kërcehej, janë hedhur pacientë, që kanë rënë në atë sheshin ku po jepej koncerti.
“E mbani mend në verë kur u mbyllën lokalet me muzike dhe pub-et, pasi ministri Blendi Klosi tha se muzika përhap koronavirusin? Duket se qeveria ka gjetur kurën tani për koronavirusin”, tha Demi.
