Përditësuar/ Të shtëna me armë zjarri janë shënuar këtë të Mërkurë, në afërsi të stadiumit, në Elbasan. Nga të dhënat parapake nga policia, bëhet me dije se, është qëlluar me armë zjarri drejt një mjeti. Nuk raportohet për persona të plagosur, deri më tani.
Ngjarja
“Rreth orës 11:50, në lagjen ‘Emin Matraxhiu’, dyshohet se gjatë një konflikti është qëlluar me armë zjarri në drejtim të një mjetit. Autori i dyshuar ka braktisur mjetin dhe është larguar. Deri në këto momente nuk ka asnjë njoftim as nga spitali dhe as nga qytetarët për ndonjë person të plagosur. Grupi hetimor ndodhet në vendngjarje dhe po punon për zbardhjen e rrethanave të ngjarjes, identifikimin dhe kapjen e autorit/ëve. Shërbimet e Policisë po krehin zonën në të cilën dyshohet se mund të jetë fshehur autori që ka qëlluar me armë zjarri”, njoftoi policia.
Të shtëndat ndaj “korçarit”
Ndërkaq, burime policore thanë se është qëlluar ndaj Ervis Çaushollit, i cili ka mundur t’u shpëtojë plumbave. Çausholli, i njohur ndryshe edhe si “korçari”, është një emër i njohur për policinë në Elbasan, pasi rezulton të jetë i përfshirë në disa ngjarje të tjera kriminale në qytet.
Një automjet tip ”Mazda” është gjetur në vendngjarje nga policia, ndërsa mbetet e paqartë nëse me mjetin lëvizte autori, apo personi ndaj të cilit u qëllua me armë.
