Një aksident i rëndë ka ndodhur para pak minutash në aksin Tepelenë-Mallakastër pranë fshatit Krahës. Mesohet se pesë persona janë lënduar rëndë mes të cilëve edhe një fëmijë 9 vjeç.
Automjeti tip Toyota me targa greke po shkonte në drejtimin verior drejt Tiranës ndërkohë që i është prerë rruga nga një kamioçinë që vinte nga një rrugë sekondare e fshatit.
Për rrjedhoje përplasja ka qenë e fortë pasi kamioçina sipas informacioneve nga grupi hetimor që ka mbërritur në vendngjarje, ka hyrë në rrugën kryesore pa sinjal.
Janë lënduar të gjithë personat që kanë qenë në makinën që vinte nga Greqia. Sipas informacioneve nga vendngjarja, në autoveturë udhëtonte një çift bashkëshortsh nga Fieri së bashku me fëmijën e tyre, si dhe gjyshi dhe tezja e fëmijës. Të pestë të lënduarit janë shtruar me urgjencë në Spitalin Rajonal të Gjirokastrës ndërkohë që njëri prej të lënduarve bashkëshortja e drejtuesit të mjetit është shtruar në ranimacion me plagë të rënda.
