Ilir Daja ka folur pas barazimit pa gola 0-0 kundër Laçit. Trajneri i Partizanit analizoi detajisht këtë sfidë, teksa u shpreh i kënaqur me atë që skuadra e tij bëri në fushë.
Daja tregoi se të kuqtë dominuan pjesën e parë si dhe iu përgjigj Cungut që u shpreh se Laçi meritonte fitoren. Në fjalën e tij për Supersport, tekniku i kryeqytetasve deklaroi:
“Kishim mungesa të rëndësishme, por kemi bërë një pjesë të parë goxha të mirë përballë një ekipi pretendent për titull. Kemi bërë gjithçka mirë në pjesën e parë. Kemi dorëzuar për disa momente lojën në pjesën e dytë. Në stol kemi pasur vetëm 5 mundësi ndërrimi, që ishin futbollistë të rinj. Në pozicionet që na duheshin, s’ishin në pozicione natyrale. Kjo bëri që të na binte forca dhe manovra, duke ia lënë një pjesë të rëndësishme kundërshtarit.
Kote dhe Bardhi? Edhe Cardoso ishte me probleme nga seanca e djeshme stërvitore. Është futur në fushë me një dëmtim që s’mund të vazhdonte më gjatë. Solomon dihet që nuk është futbollist anësor, është qendërsulmues. E kemi përdoru edhe si futbollist anësor. E kemi vonuar ndërrimin sepse Cardoso po na kërkonte ta zëvendësonim. Cara mund ta nisë nga minuta e parë.
Arbitri? Nuk dua të krijoj alibi me gjyqtarët, por në javët e para kanë bërë gabime më të mëdha. Arbitri ndikoi në uljen e ritmit në një moment kur ne e kishim lojën totalisht në kontroll. Kjo ishte, s’ishte një gjë e madhe.
A ju dominoi Laçi? Po ta analizojmë ndeshjen, pjesa e parë ka qenë e gjitha në gjysmëfushën e Laçit. S’mbaj mend të na ketë rrezikuar. Spostimi i Solomonit në krahun e majtë, e pengoi të mos futej në shpejtësi në shtyllën e dytë. Duke qenë se sot s’ishte në pozicionin e tij, ndoshta bëri më shumë ato që nuk i kishim kërkuar. Për goditjet, është mungesë e marrjes së përgjegjësisë. Ndoshta një ndeshje të tillë mund ta kishim zgjidhur me goditje nga distanca. Unë them që nuk e dominuan gjithë lojën. Nuk e di çfarë mendon kolegu. Unë do ta ndaja në dy pjesë. Në pjesën e parë ishim ne, në të dytën një pjesë më të madhe luajti Laçi”, tha ai. /Newsport.al
