Milani “fluturon” me përbindëshin Zlatan Ibrahimovich. Falë “gjigantit” suedez, kuqezinjtë morën një fitore të madhe 1-3 në “San Paolo” të Napolit dhe ringjiten në krye të Serisë A me 20 pikë, 2 më shumë se Sassuolo që është ndjekësja më e afërt.
Pas 20 minutash lojë, 39-vjeçari realizon me kokë një gol sa të bukur dhe të vështirë nga rreth 18 metra largësi, pas krosimit të Hernandez. E vështirë të gjesh gabime në mbrojtjen e Napolit apo tek portieri Meret: finalizimi i Zlatanit është thjesht perfekt.
Në të 54-tën Ibra shënoi golin e dytë, sërish me kokë, këtë radhë i shërbyer nga Rebic.
Askush nuk mund t’i bëjë ballë forcës së tij, në këtë rast duket sikur futet me gjithë top në portë.
Ndeshja u rihap në minutën e 63-të, kur Mertens, nga një distancë e afërt, realizoi për golin e 1-2, por gjërat u vështirësuan për skuadrën e Gattusos dy minuta më vonë, kur Bakayoko u ndëshkua me kartonin e dytë të verdhë.
Napoli tentoi edhe në inferioritet numerik të shmangte humbjen, por në minutën e pestë shtesë Hauge, i hedhur në fushë në vend të Rebicit, shënoi golin e “knockout”-it.
Gjashtë fitore dhe dy barazime për Milanin në këtë sezon, ecuri e një skuadre për titullin kampion.
