Pronari dhe kamerieri i një lokali në zonën e “Komunës së Parisit” në Tiranë, janë arrestuar pasi akuzohen se përshtatën lokalin për shpërndarje e përdorim droge.
Burime zyrtare nga policia njoftuan këtë të Shtunë se, bazuar në informacionet e siguruara në rrugë policore, se në një lokal në rrugën ‘Haxhi Kika’ shpërndahej lëndë narkotike, u organizua dhe finalizua operacioni i koduar “Komuna”.
Në kuadër të të cilit u bë arrestimi i shtetasve:
- D., 49 vjeç, (pronar i lokalit) i dënuar më parë për veprën penale “Prodhim dhe shitje narkotikëve”
- N., 25 vjeç (punonjës i lokalit).
Në lokal u gjetën dhe u sekuestruan rreth 388 gramë lëndë narkotike kanabis, mbetje pluhur me lëndë narkotike kokainë, një shumë pararash të dyshuara të përfituara nga shitja e lëndës narkotike, dhe 4 aparat celular.
Policia sqaron se ka proceduar penalisht edhe 4 shtetas të tjerë, klientë të lokalit, të kapur në flagrancë duke konsumuar lëndë narkotike.
Materialet proceduriale i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore për veprën penale ”Prodhimi dhe shitja e narkotikëve”, e kryer në bashkëpunim, njoftoi policia.
