Virologu i famshëm italian, Andrea Crisanti ka ngjallur polemika me deklaratën e fundit kur tha se nuk do ta bëjë vaksinën edhe nëse vjen në janar.
“Zakonisht duhen 5 deri në 8 vjet për të prodhuar një vaksinë. Për këtë arsye, pa të dhëna të disponueshme, unë nuk do ta bëja vaksinën e parë që do të vinte në janar. Sepse do të doja të isha i sigurt se kjo vaksinë është testuar siç duhet dhe plotëson të gjitha kriteret e sigurisë dhe efikasitetit. Unë kam të drejtë si qytetar dhe nuk jam i gatshëm të pranoj.”- tha ai.
Ndërkohë, kësaj deklarate të Crisanti-t i është përgjigjur epidemiologu dhe këshilltar shëndetësor i Pulias, Pierluigi Lopalco.
“Unë madje u ofrova të bëhesha pjesë e eksperimentit. Pra, fakti që nuk do të marr vaksinën është përtej diskutimit.”- tha Lopalco, duke iu referuar fjalëve të Crisanti, shtoi se është e nevojshme t’i kushtohet vëmendje komunikimit për vaksinën antikovid.
Ndërsa specialisti i sëmundjeve infektive Matteo Bassetti, drejtori i klinikës së sëmundjeve infektive në spitalin San Martino në Genova, i përcaktoi fjalët e Crisanti si shumë serioze. “Unë besoj se i gjithë komuniteti shkencor duhet të distancohet nga ajo që ka thënë ai, po ashtu edhe qeveria. Unë do të vaksinohesha që sot.”
Antonella Viola, imunologe thotë: “Nëse në janar do të thirresha për vaksinim me vaksinën Pfizer, nuk do të kisha asnjë dyshim dhe do të isha shumë e lumtur ta bëja. Dhe jo sepse jam pa ndjenja ose e pavetëdijshme, por për arsyen e kundërt. Kam studiuar për vaksinën, e di se si është bërë dhe si funksionon, kam ndjekur eksperimentimin dhe i njoh rregullat strikte që (me shpresë) do të çojnë në aprovim. Dituria të çliron nga frika, nga e panjohura.”
