Pas humbjes së turpshme të Gjermanisë, 6-0 në Ligën e Kombeve ndaj Spanjës, gishti është drejtuar në drejtim të trajnerit, Joachim Low.
Vetë tekniku gjerman u shpreh një ditë pas ndeshjes: “Nëse duhet të merakosem për vendin e punës, duhet të pyesni persona të tjerë”.
Në lidhje me këtë situatë, sipas asaj që shkruan “Bild”, presidenti i Federatës, Keler, Oliver Birhof dhe Markus Sorg, patën një takim në një nga lozhat “VIP” në terminalin e Mynihut. Aty është diskutuar për 30 minuta rreth së ardhmes së trajnerit.
Vendimi? – Low as nuk do të shkarkohet dhe as nuk do të dorëhiqet, të paktën për momentin. Vetë trajneri nuk ishte i pranishëm në mbledhje, ai u pa shumë pak në ambientet e aeroportit, teksa ndezi një cigare.
Presidenti i Federatës doli me një deklaratë zyrtare ku u shpreh: “Ne kemi nisur një rrugëtim të gjatë dhe të vështirë së bashku me trajnerin. Siç e pamë edhe të martën në mbrëmje, ky nuk do të jetë një rrugëtim i lehtë, por nuk mund të marrim vendime të nxituara dhe duhet të besojmë te zgjedhjet që kemi bërë në të shkuarën për të mirën e Gjermanisë”, tha 63-vjeçari, duke konfirmuar edhe një herë tjetër qëndrimin e trajnerit të kombëtares gjermane në një moment jo shumë të lehtë.
