Seanca parlamentare e planifikuar për tu zhvilluar të Enjten, do të anulohet. Urdhrin e ka firmosur kryetari i Kuvendit Gramoz Ruçi, i cili sqaron se vendimi vjen pas masave të reja të marra nga Komiteti Teknik i Eksperteve për situatën e pandemisë në vend.
“Në zbatim të Vendimit të Komitetit Teknik të Ekspertëve të datës 17.11.2020 dhe të Urdhrit të Ministres së Shëndetësisë dhe Mbrojtjes Shoqërore nr. 633, datë 17.11.2020 ‘Për ndalimin e grumbullimeve në vende të mbyllura apo të hapura’, Kryetari i Kuvendit vendosi që të mos zhvillohet seanca plenare e Kuvendit të Shqipërisë, e planifikuar për ditën e enjte, datë 19 nëntor 2020”, thuhet në vendimin e Ruçit
Burime zyrtare nga Kuvendi shtuan se Ruçi i është drejtuar Komitetit Teknik të Ekspertëve dhe Ministres së Shëndetësisë dhe Mbrojtjes Shoqërore, Ogerta Manastirliu, për të bërë një interpretim lidhur me vazhdimin e seancave plenare të Kuvendit.
Ndërkohë, puna në komisionet parlamentare vazhdon online.
