Shqipëria po luan prej orës 16:00 finalen për vendin e parë në grupin 4 të Ligës C në Nations League.
Kuqezinjtë e Edi Rejës përballen me Bjellorusinë në “Air Albania”, takim që duhet fituar për ta mbyllur në krye të grupit.
Ndihmësi i Rejës, Ervin Bulku, në një prononcim përpara fillimit të ndeshjes me Bjellorusinë ka shpjeguar formacionin zyrtar të Shqipërisë.
Disa ndryshime ka bërë trajneri i Kombëtares edhe për faktin se ishte i detyruar, kur përmendim rastin e Hysajt dhe Abrashit.
Ndërkohë në bazë të zgjedhjeve taktike janë ulur në stol Kallaku e Uzuni. Por përse vjen kjo zgjedhje e Rejës duke hequr këta futbollist? Ervin Bulku e ka shpjeguar në këtë mënyrë: “Zgjedhja për Uzunin ishte zgjedhje taktike e trajnerit. Disa lojtarë të nevojiten më shumë kur vijnë nga stoli sesa nga minuta e parë. Kjo ishte zgjedhje e Rejës. Sa i përket mesfushës, Laçi gjen vend për shkakun e mungesës së Abrashit”, tha Bulku për “Super Sport”.
