Megjithëse ka kaluar 30 vjet nga rrëzimi i sistemit diktatorial, duket se nostalgjikët e diktaturës dhe diktatorit më kriminel të Europës, nuk ndalen.
Shfrytëzojnë çdo moment për t´u shfaqur me portretet e Enver Hoxhës dhe pankartat për PPSH.
Në një vend që nuk ka dënuar ende krimet e komunizmit, ku familjarë të viktimave kërkojnë eshtrat e të afërmve të tyre, ku pasardhës direkt të ish-funksionarëve të PPSH janë në qeverisje apo militojnë në parti politike, nuk është çudi që të ketë ende nostalgjikë të diktaturës dhe diktatorit.
Sot, me rastin e 76 vjetorit të çlirimit të Tiranës nga pushtimi nazi-fashist, nostalgjikët e komunizmit marshuan drejt Ushtarit të Panjohur, duke mbajtur në dorë banderolën:
“Rroftë Partia Komuniste Shqiptare”, ndërsa përshëndesnin me grusht.
Siç shihet nga këto foto ata kishin përgatitur një buqetë në formë ylli me trëndafila të kuq, ndërsa nuk munguan as fotot e diktatorit Enver Hoxha.
