Agron Hysenlliu, drejtor i Institutit të Ndërtimit, u ndah nga jeta mëngjesin e sotëm.
Njoftimin e ka dhënë kryebashkiaku Erion Veliaj, që në një postim në rrjetet sociale shprehet se Hysenlliu ishte një profesionist i shkëlqyer, që nuk u kursye asnjë ditë duke ndihmuar këdo që humbi shtëpinë në tërmetin e 26 nëntorit.
“Sot ai u nda nga jeta, duke lënë pas trishtimin e ikjes së një njeriu të rrallë e inxhinieri unik. Tirana e re që po ndërtohet rrënojash, do mbajë përjetë emrin e tij”, shkruan Veliaj.
Hysenlliu, pas tërmetit të 26 nëntorit, shkaktoi debate të shumta, në publik, lidhur me mënyrën sesi vlerësoheshin ndërtesat e dëmtuara ose jo, nga ky tërmet.
Me firmën e tij si drejtues i Institutit të Ndërtimit, Hysenlliu vendoste nëse një objekt shembej ose jo, dhe mediat, në jo pak raste, publikuan dokumente vlerësimi të ndryshme, për të njëjtin objekt.
Një nga këto objekte ishte pikërisht edhe shkolla Sami Frashëri, e cila u rrafshua nga Bashkia e Tiranës, me pretendimin se ishte dëmtuar nga tërmeti, edhe pse për rikonstruksionin e saj, 1 vit para 26 nëntorit, ishin shpenzuar miliona lekë.
