Rekomandimi i autoriteteve shëndetësore është i qartë, maska kirurgjikale duhet të hidhet pas përdorimit. Por, të ballafaquar me mbeturinat që grumbullohen dhe me koston që mbajnë qytetarët, zërat kërkojnë ripërdorimin e tyre me kusht, për publikun e gjerë.
“Maskat mjekësore janë me një përdorim. Hidheni menjëherë maskën”, konfirmon Organizata Botërore e Shëndetësisë (OBSH).
Pavarësisht të gjithave, në rast mungese ashtu si në fillim të pandemisë së COVID019, OBSH-ja pranoi procedura të jashtëzakonshme për dekontaminimin e maskave për të lejuar ripërdorimin e tyre.
Agjencia amerikane e medikamenteve (FDA) vërtetoi gjithashtu urgjentisht një proces të dekontaminimit të maskave N95 (për personelin shëndetësor, ekuivalent me FFP2) duke i spërkatur me peroksid hidrogjeni.
Metoda të tjera ekzistojnë në një kontekst profesional, siç janë ekspozimi ndaj temperaturave të larta ose rrezatimi ultraviolet.
“Por kjo nuk është praktike për individët”, vëren Denis Corpet, mikrobiolog dhe profesor i higjienës, anëtar i Adios Corona, një kolektiv i shkencëtarëve francezë nga specialitete të ndryshme.
Ndërkohë për kufizimin e ndotjeve plasitike të gjeneruara nga këto maska me polypropylene dhe shpenzimet e familjeve, Adios Corona kërkon, në një kontekst shtëpiak, ku njerëzit janë më pak të ekspozuar me ngarkesat virale krahasuar me personelin mjekësor të reanimacionit, për “metodën e zarfeve”.
Të vendosësh maskën tënde të përdorur, përveç rasteve kur është e dëmtuar, në një zarf letre, duke ishkruar datën, dhe ta lësh aty për shtatë ditë.
“Disa studime shkencore tregojnë se në një maskë, viruset (e Sars-Cov-2) janë pothuajse të gjithë të vdekur në 7 ditë”, justifikon Denis Corpet.
Kështu, sipas rezultateve të një ekipi nga Universiteti i Hong Kongut botuar në The Lancet, vetëm 0,1% e vëllimit të virusit është ende e dukshme në pjesën e jashtme të maskës pas një jave.
Peter Tsai, shpikës i teknologjisë së ngarkimit elektrostatik të maskave N95, e cila tërheq grimca për të penguar kalimin e tyre, gjithashtu pajtohet me metodën shtatë ditore.
“Për të kufizuar konsumin dhe për të ruajtur mjedisin, unë do të rekomandoja ripërdorimin e maskës pas shtatë ditësh, dhe kjo 5-10 herë për popullsinë e përgjithshme. Siç bëj unë”, theksoi ai.
Ai gjithashtu përmendi mundësinë e kalimit të maskës në furrë, jo shumë e nxehtë për të parandaluar djegien e plastikës, por mjaft për të vrarë virusin.
“Temperatura duhet të kontrollohet për të qëndruar midis 70 dhe 75 gradë Celsius”, nënvizon shkencëtari në pension i cili u kthye në shërbim në Universitetin e Tenesit gjatë kësaj krize si pasojë e COVID-19.
/ata/
