Ministrja e Shëndetësisë dhe Mbrojtjes Sociale, Ogerta Manastirliu, gjatë një komunikimi me mediet, ka reaguar për ngjarjen që ka ndodhur gjatë ditës së sotme në spitalin Infektiv ku një pacient ka tentuar të vetëvritet duke tentuar të hidhet nga dhoma e tij.
Ministrja tha se të gjithë pacientëve në spital po u shërbehet me përkushtim nga stafet mjekësore. “Qytetarit dhe 120 qytetarë të tjerë që po marrin shërbim në Spitalin Infektiv, nuk u ka munguar asgjë”, theksoi ajo.
“Dua të shpreh keqardhjen time të thellë, për një ngjarje të rëndë, të ndodhur në spitalin infektiv. Stafi Mjekësor është duke u kujdesur për pacientin qe ka tentuar aktin tragjik. Ju siguroj që po kryhen të gjitha hetimet dhe verifikimet. Qytetarit dhe 120 qytetarë të tjerë që po marrin shërbim në Spitalin Infektiv, nuk u ka munguar asgjë. Shërbimin mjekësor e kanë marrë dhe do të vazhdojnë ta marrin nga mjeket dhe infermieret që janë në frontin e luftës me një armik të padukshëm për më shumë se 8 muaj”, deklaroi Manastirliu.
