Institucioni arsimor “Turgut Ozal” ka kallëzuar sot në Prokurorinë e Tiranës, Policinë e Shtetit, për akuzën e shpërdorimit të detyrës. Sipas avokatit të kësaj shoqërie, kallëzimi është bërë për 12 punonjës, pasi siç u shpreh ai, “policia ka kryer kontrolle kundra ligjit në këtë institucion, pas asnjë mandat të dhënë nga gjykata dhe prokuroria”.
Avokati tha se shoqëria së fundmi është kontrolluar edhe nga Drejtoria e Përgjithshme e Tatimeve, nga kontrolli i së cilës nuk është konstatuar asnjë parregullsi dhe shkelje.
“Kanë ndodhur disa kontrolle që i gjykojmë se janë kundra ligjit, i kemi adresuar kallëzimin penal prokurorisë së Tiranës për procedurat përkatëse. Janë rreth 12 persona të kallëzuar. Ka ndodhur një kontroll i paligjshëm. Kanë kryer kontrolle, pa pasur një mandat, vendim gjykate dhe prokurorie. Këto veprime i ka diktuar dhe prokuroria 20 vite më parë. Kontrollet nuk mund të bëhen, veçse duke respektuar kodin”, tha avokati në një prononcim për gazetarët pas depozitimit të kalëzimit.
Hetimi për pastrim parash
Kompania turke “Turgut Ozal” ndodhet nën hetim për pastrim parash.
Sipas hetuesve, ekzistojnë dyshime se kjo kompani nuk justifikon blerjen e disa pasurive në vendin tonë.
Për këtë arsye, ditët e fundit, janë marrë në pyetje disa përfaqësues të saj së bashku me administratorin, Blendar Dyrmishi.
Përgjatë ditëve të fundit, dokumentat e kësaj kompanie janë verifikuar nga institucionet tatimore në vend.
Hetimi raportohet se ka nisur pas derdhjes së vlerës prej 10 milionë dollarë të shitjes së aksioneve te “Turgut Ozal”.
