Agjencia amerikane e medikamenteve (FDA) akordoi një autorizim të përkohshëm për një trajtim të një lloji të ri kundër COVID-19, antitrupa sintetikë të prodhuar nga Eli Lilly, vetëm për të sëmurët lehtë dhe të moderuar dhe jo për pacientët e shtruar në spital apo nën oksigjen.
Trajtimi është zhvilluar specifikisht kundër koronavirusit të ri.
Trajtimet e tjera si remdesiviri dhe deksametazoni, kanë marrë nivele të ndryshme autorizimi pasi kanë treguar një farë efikasiteti, por këto molekula ekzistonin para pandemisë dhe janë ripërdorur kundër COVID-19.
Pak më shumë se një muaj pas kërkesës së amerikanit Eli Lilly, FDA dha “një autorizim për një përdorim urgjent” për trajtimin e ri, bazuar në rezultatet e një studimi klinik të kryer në 465 të rritur jo të shtruar në spital.
Ajo është e kufizuar për të rriturit dhe fëmijët mbi 12 vjeç, me peshë të paktën 40 kilogramë, dhe të cilët kanë një rrezik të lartë për të kaluar një COVID-19 të rëndë apo një shtrim në spital.
Trajtimi, bamlanivimab, jepet si një injeksion i vetëm intravenoz.
Presidenti Donald Trump, në fillim të tetorit, mori një trajtim të ngjashëm, një koktej me antitrupa “monoklonale” të zhvilluara nga kompania amerikane Regeneron, dhe të cilën ai e vlerësoi gjerësisht pas shërimit.
Këto antitrupa imitojnë atë që bën sistemi imunitar pas infektimit me koronavirusin, duke bllokuar majën e virusit që e lejon atë të bashkohet dhe të depërtojë në qelizat njerëzore.
Konsiderohet se është më efektive gjatë fazës fillestare të infeksionit, kur antitrupat kanë akoma një shans për të kontrolluar pushtuesin, dhe jo gjatë fazës së dytë të COVID-19, kur rreziku nuk është më vetë virusi i njëjtë por reagimi i tepërt i sistemit imunitar i cili sulmon mushkëritë dhe organet e tjera.
Në provën klinike, bamlanivimab zvogëloi përqindjen e pacientëve të shtruar në spital ose duke shkuar në urgjencë brenda 28 ditëve nga injeksioni. /ata/
