Të hënën, Instituti Kombëtar i Shëndësisë Publike në Kosovë njoftoi se gjatë 24 orëve të kaluara regjistruar 637 raste me koronavirusin e ri, nga 1 712 testime.
Po ashtu, u raportuan 13 humbje jete.
Sipas IKSHPK-së, janë shënuar edhe 104 pacientë të shëruar nga sëmundja, ndërsa raste aktive janë 7 798.
Që nga fillimi i pandemisë në Kosovë janë regjistruar 24 792 të infektuar, prej të cilëve 768 kanë vdekur ndërsa 16 226 janë shëruar.
Ministri i Shëndetësisë i Kosovës, Armend Zemaj, zhvilloi të hënën një takim me kryetarët e komunave, me të cilët diskutoi për hapat që duhen ndërmarrë për frenimin e përhapjes së koronavirusit. Zemaj tha se lakorja e rasteve të fundit kërkon kujdes të shtuar dhe aktiv.
Në fundjavën që shkoi, në Kosovë ka qenë e ndaluar veprimtaria e të gjitha subjekteve afariste dhe bizneseve, me qëllim frenimin e përhapjes së koronavirusit. Në këtë periudhë janë mbyllur edhe qendrat tregtare dhe rekreative dhe subjektet që ofrojnë shërbime të gastronomisë në të gjithë territorin e Kosovës. Në fundjavë, po ashtu, qytetarëve të shtatë komunave të Kosovës – Prishtinë, Fushë Kosovë, Gjilan, Obiliq, Gjakovë, Podujevë dhe Shtime – u janë ndaluar hyrjet dhe daljet, përveç në disa raste të domosdoshme.
