Kreu i PD-së, Lulzim Basha u shpreh në një emision televiziv se Rama, në mënyrë të qëllimshme, po i mban të ulta testimet e Covid dhe po ndihmon në përhapje e virusit.
“Njerëz në këto momente po përdoren për të mbuluar dështimet e Ramës, të cilit i ka dalë pandemia jashtë kontrollit. Rama në mënyrë të qëllimshme po i mban të ulët dhe aktivisht po ndihmon në përhapje e virusit, prandaj qeveria ka përgjegjësi politike për këtë situatë”, tha Basha, i ftuar në “Tempora” në RTV Ora.
“Po të shohësh grafikët, numri i testimeve në Shqipëri është i fundit në rajon. Qesen e parave e ka në dorë Edi Rama. Ai sa herë kapet me presh në duar, fshihet pas dikujt tjetër. Këtë herë ka zgjedhur komitetin teknik. Të gjitha paratë këto ditë po shkojnë në inceneratorët e plehrave të cilët nuk ekzistojnë, janë në 3D. Nga ana tjetër ne kemi numrin më të ulët të mjekëve në Evropë. Shëndetësia vuan nga probleme të mbartura”, shtoi ai.
