BKH pranon se ka gabuar me llogaritjen e pikëve të njërit prej kandidatëve për hetues.
Përmes një njoftimi, BKH bën me dije se pasi mori disa ankesa prej kandidatëve, ka kryer rishikimin e të gjithë dokumentacionit të garuesve të cilët morën pjesë në testin e aftësive fizike.
“Prej këtij rishikimi të dytë të proces-verbaleve rezultoi se, si pasojë e një gabimi njerëzor, një kandidat i vlerësuar me pikë të mjaftueshme kualifikuese është vendosur gabimisht në listën e të skualifikuarve në programin Excel gjatë përpunimit të të dhënave prej Sekretarisë Teknike. Si pasojë, kandidati nuk është ftuar në fazën tjetër të rekrutimit. Në këto kushte, dhe në përputhje me parashikimet e Rregullores, kandidati i përmendur më lart i nënshtrohet Testit të Shkrimit të Esesë. Të gjitha rezultatet e tjera janë konfirmuar të sakta”, njofton BKH.
“Të gjithë hapat e procesit të rekrutimit po monitorohen prej një Komisioni Ndërkombëtar për të siguruar ruajtjen e standardet”, shton më tej BKH.
