Ish-kryeministri Sali Berisha thotë se për përfshirjen në listën e kandidatëve për deputetë të Ervin Salianjit, vendosin forumet e PD.
“Asnjë instancë, asnjë forum, nuk operon dot jashtë gabimeve. Por në tërësinë e vet ai ka bërë një punë të admirueshme. Ka një gjë themelore për çdo forcë politike. Ka një kriter që ai është gjithmonë kriteri i drejtimit të partisë politike. I organeve drejtuese të partisë politike. Ky është kriteri politik. Në këtë kontekst natyrisht fjalën përfundimtare apo listën përfundimtare të deputetëve të PD është pa asnjë mëdyshje vepër e kryesisë së PD, kryetarit dhe Këshillit Kombëtar të saj. Në vendin ku primare janë më të konsoliduara se kudo tjetër në fund pastaj, voton konventa për kandidatin përkatës të partisë të dhënë. Dhe në konventë mund të paraqiten dy kandidatë dhe ai që merr vota më shumë zgjidhet si kandidat kryesor”, tha Berisha në një emision televiziv.
-Me humor shkruan një shikues se Edi Rama thotë më mirë Saliu dhe Salianji, tani që ka ikur Salianji çfarë do bëjë Saliu.
Berisha: “E para ka dëshirë të ikë Salianji, por janë forumet e partisë që vendosin për Salianjin. Nuk vendos as Edi Rama dhe as Sali Berisha. Është festë e parakohshme e Edi Ramës”.
I pyetur se ku do të kandidonte si deputet dhe nëse ishte Qarku i Tiranës, Berisha tha duke qeshur: “Top sekret”.
Berisha pyetet edhe për rihapjen e procesit gjyqësor për ish-badigardin e tij, Izet Haxhia, i akuzuar për përfshirjen në vrasjen e Azem Hajdarit. Midis dëshmitarëve të përfolur për t’u thirrur, është edhe Sali Berisha. Ish-kryeministri tha se në “Hard talk nga Roland Qafoku”, se është thirrur dhe se dëshminë e tij e ka dhënë në vitin 2002 duke ia dorëzuar ambasadorit amerikan në atë kohë Robert Frowick.
-Në media ditët e fundit thuhet se ju mund të thirreni të dëshmoni për çështjen e Azem Hajdarit. A do të shkoni?
Berisha: Unë kam bërë një dëshmi shteruese për të gjitha ato për të cilat unë kam pasur dijeni për çështjen Hajdari. Ajo dëshmi i është bërë Ambasadorit të SHBA-ve Robert Froëick e noterizuar dhe ai ja ka dorëzuar Arben Rakipit dhe prokurorëve ndërkombëtarë. Unë nuk kam qenë kurrë dëshmitar okular.
-Juve nuk iu kanë thirrur asnjëherë?
Berisha: Asnjëherë në mënyrë absolute. Ato ishin truke të ulëta të Fatos Klosit dhe Arben Rakipit të cilët bënin scoope mediateke. Sepse çfarë kam ditur ja kam përcjellë ndërkombëtarëve dhe asnjë prej tyre nuk përbënte provë. Ato ishin dëshmi të ndryshme që duheshin verifikuar. Por ata që lexojnë dosjen, do ta gjejnë atë dëshmi sepse e kanë në dosje.
-Po nëse ju thërrasin a do shkoni?
Berisha: Nuk kanë asnjë motiv që të thërrasin. Unë çfarëdo që kam patur kam qenë shterues.
