Këtë të dielë akrepat e orës janë kthyer një orë prapa. Ka qenë ora 03:00 e mëngjesit të sotëm kur akrepat e orës u kthyen një orë prapa duke kaluar në orën 02:00.
Kalimi nga ora verore në orën dimërore për herë të parë u vu re në vitin 1916 në vendet e Evropës Veriore dhe deri tani është vendosur në rreth 70 vende, kryesisht në hemisferën veriore.
Ndërkohë pritet që duke filluar nga viti 2021 vendet e BE-së, secila veç e veç, do të vendosin nëse do të ndjekin praktikën e ndryshimit të orës, apo do të aplikojnë orën sipas kalendarit.
Ndryshimi i kohës në Evropën Perëndimore u vendos në fillim të viteve 1970 me arsyetimin se me atë zgjatet dita, mundësohet kursimi i energjisë elektrike, rritet produktiviteti, përmirësohet përshtatja e njerëzve dhe dita e punës bëhet më efikase.
Por njerëzit kanë diskutuar shpesh nëse duhet ta mbajmë sistemin ashtu siç është, të qëndrojmë me orën e kursimit të ditës gjatë gjithë vitit ose ta heqim atë plotësisht. Ata që e mbajnë atë gjatë gjithë vitit argumentojnë se kjo do të na ndihmonte për të kursyer energji, për të zvogëluar trafikun dhe për të përmirësuar shëndetin fizik dhe mendor.
Një kundër-argument i zakonshëm është që fëmijët rrezikohen gjatë rrugës për në shkollë në mëngjeset e errëta të ditëve të dimrit.
Ata që mbështesin ndryshimin e orës thonë se orët më të gjata të ditës në verë ndihmojnë për të mbledhur energji e për të rritur produktivitetin në punë. Ndërkohë kundërshtarët argumentojnë se është shumë e vështirë të përshtatesh me ndryshimin e orës dhe se kjo gjë ndikon negativisht në çështje të shëndetit.
