Kryetari i PD, Lulzim Basha deklaroi këtë të Enjte se SPAK s’ka bërë asnjë veprim real në hetimet ndaj inceneratorëve, për kontratat e të cilave PD ka depozituar kallëzim penal në Prokurorinë e Posaçme.
I ftuar në një emision televiziv, Basha u njoh me reagimin e SPAK për mediat se “Prokuroria e Posaçme i ka regjistruar paditë penale, por s’mund të bëjë publike proceset hetimore”.
Pyetjes “pse ushtroni presion”, Basha iu përgjigj se SPAK “mund dhe duhet të përgjigjet”. “Është detyrë e çdo institucioni të përgjigjet, për më shumë kur bëhet fjalë për jetën e shëndetin e shqiptarëve”, tha Basha.
Kryedemokrati deklaroi se shpenzimet për inceneratorët erdhën në një kohë kur qytetarët janë në krizë për shkak të pandemisë dhe sipas tij, s’janë mbështetur mjaftueshëm nga qeveria.
“Shohim thesarin e shtetit ku ka pagesa për inceneratorët dhe kjo na ka sjellë në mënyrë të natyrshme te denoncimi. Qeveria harxhon lekët për inceneratorët në vend që të bëjë testime, gjurmime, kur duhet ti gjendeshin njerëzve pranë. Koha që drejtësia të veprojë”, u shpreh Basha.
Ai vijoi më tej duke këmbëngulur se SPAK duhet të japë informacion lidhur me hetimet.
“Sa prokurorë janë caktuar, sa policë gjyqësorë? SPAK mund të bëjë publike angazhimin e burimeve njerëzore. Kur ka çështje të interesit publik, prokuroria gjithnjë ka bërë transparencë. Kemi informacion, sot që flasim ka vetëm 1 prokuror të ngarkuar për tre afera dhe s’ka asnjë veprim real. Ky është shqetësimi ynë. Në këtë aferë janë të përzierë politikanë dhe krimi i organizuar”, u shpreh ai.
“Do anulohen koncesionet korruptive”/ A ka rrezik nga Arbitrazhi? Basha: Jo me ligjin anti-mafia
