Kryetari i PD, Lulzim Basha premtoi ulje taksash për biznesin e vogël dhe të madh nën qeverisjen demokrate. Ai tha se buxheti i shtetit i ka paratë për ta bërë këtë, por shtoi se “ne jemi një vend i vjedhur dhe jo i varfër”.
“Unë kam ndjekur një politik të taksave të ulëta si në bashki si në qeveri. Nga ana tjetër kemi një filozofi tjetër që premtoi ulje takash për 97 përqind të shqiptarëve, por të gjithë shqiptarët paguajnë më shumë. Më taksimin progresiv paguajnë më shumë ata me të ardhura më të larta, por sigurisht që janë rritur për të gjithë”, tha Basha.
“Me buxhetin e vitit 2021 pranon që do rriten taksat. Thonë që taksat do rriten me 25 mln euro, në fushatë thotë: do i ul. Fiskalizimi i biznesit kushton 2 mln euro. Jemi në një krizë të thellë që s’ndryshohet pa ndryshuar rrugë”, shtoi.
Basha tha se nën qeverisjen e PD, biznesi i vogël do paguajë taksa jo më shumë se 50 përqind të xhiros. Ai tha se në çdo rast do paguajë më pak se aktualisht.
Për biznesin e madh, shtoi se do aplikohet taksa e sheshtë 9 përqind.
“Kemi llogaritur se do kemi 550 mln euro të ardhura më shumë, sepse rritet baza e taksimit, luftohet informaliteti dhe e dyta sepse edhe biznesi shqiptar me heqjen e takës Rama të qarkullimit dhe taksat e tjera do ketë mundësi rritje. Duke nisur nga viti 2022 taksat do njohin një rritje 350 deri 550 mln euro në vit dhe paratë s’do shkojnë për fasadë dhe kontratat koncesinare korruptive, por për investime publike në dobi të qytetareve”, deklaroi.
Basha premtoi se “do rriten pensionet gradualisht”.
