Dy persona janë vënë në pranga nga policia e Durrësit në vijim të aksionit të koduar “Bye Pass”, që javën e kaluar çoi në arrestimin e disa punonjësve të ARRSH-së Durrës.
Në pranga u vunë ndërtuesi Xhevat Vataksi 62 vjeç, banues në Shkodër, për veprën penale “Dhënia ndihmë për ndërtim të paligjshëm” dhe punonjësja e ARRSH Durrës Aferdita Basha, 48 vjeçe, banuese në Tiranë. Ajo akuzohet për veprën penale “Shpërdorimi i detyrës”. Policia ekzekutoi masat e sigurisë “arrest me burg”, të lëshuara nga Gjykata e Durrësit.
Javën e kaluar, u arrestuan 3 punonjës së ARRSH-së. Në seancën për rivlerësimin e masës së sigurisë, gjykata zbuti masën e sigurimit nga “arrest me burg” në ”detyrim paraqitjeje” për dy prej tyre, ndërsa la të pandryshyar masën “arrest shtëpie” për të tretin.
Burime zyrtare pranë akuzës së Durrësit sqaruan se faktet mbi të cilin është regjistruar procedimi penal kanë të bëjnë me një sërë aksidentesh automobilistike që kanë ndodhur në rrugën nacionale Plepa-Kavajë. Konkretisht, në kilometrin e tretë, ndodhet një pikë furnizimi me karburant, i cili dyshohet se është ndërtuar dhe ka marrë leje në kundërshtim me ligjin. Për këtë rast janë kryer hetime ndaj të dyshuarve, specialistë inxhinierë të ARRSH si dhe drejtorëve të drejtorive të ARRSH-së dhe anëtarëve të Këshillit Teknik.
