Ministria e Arsimit ka reaguar pas raportimeve nga media dhe PD, lidhur me rastet e infeksioneve me koronavirus në shkollën “Emin Duraku” në kryeqytet.
Ministria, në një njoftim për mediat, bën me dije se “për shkak se disa mësues kanë rezultuar me COVID-19 dhe disa të tjerë janë karantinuar, nga ana e DPAP dhe zyrës arsimore vendore Tiranë janë marrë masat e menjëhershme për zëvendësimin e tyre në mënyrë që mësimi të vijojë pa ndërprerje”.
“Ndërkohë, procesi i dezinfektimit në këtë shkollë është kryer 3 herë gjatë gjithë javës së shkuar, teksa dezinfektimi më i fundit është realizuar ditën e djeshme”, shton ministria.
Te “Emin Duraku”, mësimi vijon normalisht. Në një deklaratë më herët gjatë ditës, Albana Vokshi nga PD tha se nga drejtoria e shkollës, nuk janë lajmëruar prindërit lidhur me rastet me koronavirus. Ndërkohë që në reagimin për mediat, ministria nuk sqaron se pse nuk janë informuar prindërit e fëmijëve.
