171 gjoba me vlerë 3.000 lekë secila, u vendosën një ditë më parë nga policia e shtetit ndaj individëve të cilët nuk kishin maskë me vete.
Policia njoftoi se ”gjatë kontrolleve, është konstatuar që shumica e qytetarëve i kishin vendosur maskat mbrojtëse. Në rastet kur janë konstatuar qytetarë që nuk kishin maska ose që i kishin por nuk i vendosnin në fytyrë, shërbimet e Policisë i kanë këshilluar ata për vendosjen e tyre. Gjatë kontrolleve në të gjithë vendin, shërbimet e Policisë kanë vendosur edhe gjoba për qytetarët që nuk kishin vendosur maskat dhe as nuk i kishin ato me vete”.
Akti Normativ që detyron mbajtjen e maskës me vete në çdo ambient hyri në fuqi një ditë më parë. Në rast se shkelja është e përsëritur, gjoba do të rritet në shumën e 50 mijë lekëve të vjetra.
Përveç policisë së shtetit, të drejtë për vendosjen e gjobave ka edhe policia bashkiake.
