Hetimet/ Kush janë zyrtarët e ARRSH-së të arrestuar, në kërkim dy ndërtues

Përditësuar/ Detaje të reja mësohen lidhur me arrestimet e disa zyrtarëve të Autoritetit Rrugor në Durrës. Tre punonjës janë vënë në pranga, ndërsa 4 janë shpallur në kërkim. Po ashtu, edhe dy ndërtues janë në kërkim policor.

Hetimet

Burime zyrtare pranë akuzës së Durrësit sqaruan se faktet mbi të cilin është regjistruar ky procedim kanë të bëjnë me një sërë aksidentesh automobilistike që kanë ndodhur në rrugën nacionale Plepa-Kavajë.

Konkretisht, në kilometrin e tretë, ndodhet një pikë furnizimi me karburant, i cili dyshohet se është ndërtuar dhe ka marrë leje në kundërshtim me ligjin, shtuan të njëjtat burime.

Për këtë rast janë kryer hetime ndaj të dyshuarve, specialistë inxhinierë të ARRSH si dhe drejtorëve të drejtorive të ARRSH-së dhe anëtarëve të Këshillit Teknik. Ata janë: Agron Hasa, Kastriot Braha, Aferdita Basha, Dhurata Lazaj, Spartak Tarkaj, Astrit Zenelaj, Leke Tushaj.

Prokuroria sqaron se është drejtuar me kërkesë në gjykatë për caktimin e masave të sigurimit ndaj tyre.

Të arrestuarit

Policia, ndërkohë, njoftoi sot 3 arrestime. Burime zyrtare bënë me dije se u ekzekutuan masat e sigurisë “Arrest në burg” ndaj shtetasve:

1. Leke Tushaj, 50 vjeç, banues në Tiranë, me detyrë inxhinier pranë ARRSH Durrës, për veprën penale “Shpërdorimi i detyrës”;
2. Kastriot Braha, 56 vjeç, banues në Tiranë, me detyrë inxhinier pranë ARRSH Durrës, për veprën penale “Shpërdorimi i detyrës”;
3. Masa e sigurisë “Arrest në shtëpi” për shtetasin Agron Hasa, 63 vjeç, banues në Tiranë, me detyrë inxhinier pranë ARRSH Durrës, të cilit Gjykata e Shkallës së Parë Durrës i ka caktuar këtë masë për veprat penale “Shpërdorimi i detyrës” dhe “Falsifikimi i dokumenteve”.

Në kërkim

Po, ashtu, policia njoftoi se u bë shpallja në kërkim e 6 personave, 4 punonjës së ARRSH dhe dy ndërtuesve:

Aferdita Basha, 48 vjeçe, Dhurata Lazaj, 55 vjeçe, Astrit Zenelaj, 56 vjeç dhe Spartak Tarka, 47 vjeç, banues në Tiranë, me detyrë inxhinier pranë ARRSH Durrës, pasi Gjykata e Shkallës së Parë Durrës iu ka caktuar masat e sigurisë “Arrest në burg”, për veprën penale “Shpërdorimi i detyrës”.

• Xh. V., 62 vjeç, banues në Shkodër, me detyrë ndërtues, pasi Gjykata e Shkallës së Parë Durrës i ka caktuar masën e sigurisë “Arrest në burg”, për veprën penale “Dhënia e ndihmës për ndërtim të paligjshëm” kryer në bashkëpunim.
• R. A., 36 vjeç, banues në Tiranë, me detyrë ndërtues, për veprën penale “Dhënia e ndihmës për ndërtim të paligjshëm” kryer në bashkëpunim.