Greva e naftëtarëve të Ballshit ka hyrë këtë të Mërkurë, në ditën e 17.
Kreu i Sindikatës së naftëtarëve, Sokol Dautaj në një dalje për mediat, jashtë ambienteve ku zhvillohet greva, është thekson se kërkesat e tyre janë shumë të qarta, por askush nuk i ka marrë parasysh.
“Është i gjithë fati i qytetit. Rafineria punon me naftëtarë. Të na japin ca na takon, ikim ne shikojmë hallin tonë. Hapi i radhës është shumë i qartë, kjo është në dorën e naftëtarëve, më shqip dhe qartë që i kemi shprehur kërkesat tona, nëse do ia lëmë Zotin, ne të vdekur jemi”, tha Dautaj.
Ai tha se me grevën, donin të tregonin se në ambientet e rafinerisë nuk vjen pronari, ndërsa kanë bërë apel për ndërhyrjen e instancave shtetërore për zgjidhjen e problemit të tyre.
Ata u përplasën dhe me policinë private teksa tentuan të futen në ambiente të rafinerisë.
Kujtojmë se naftëtarët kërkojnë pagat e prapambetura dhe rinisjen e punës në rafineri.
Për problemin e naftëtarëve, kryeministri Edi Rama tha një ditë më parë se nuk ka ende një zgjidhje.
“Unë e kam dhënë përgjigjen time, sa të kem një zgjidhje do ja jap atyre. Kjo është një marrëdhënie kapitaliste, jo me shtetin. Për sa më takon po bëj gjithçka për një zgjidhje, deri tani se kemi një zgjidhje. S’kemi mundësi të zgjidhim atë problem nëse s’kemi një fuqi që e merr përsipër nga pikëpamja private. Është një kompani private, është një marrëdhënie private, të gjitha ca kemi bërë kanë qenë përpjekje ekstra për të ndihmuar ata njerëz. Nëse e bëjnë që të sensibilizohem unë, është mundim i panevojshëm. Me ndihmën e Zotit e zgjidhim shpejt”, tha Rama në një konferencë për gazetarët.
