Kryeministri Edi Rama duket se ka ndryshuar qëndrim lidhur me miratimin e amnistisë fiskale, ndërsa thotë se ajo do të miratohet pasi të jetë certifikuar edhe nga ekspertiza ndërkombëtare.
Gjatë bashkëbisedimit me ndjekësit në rrjetet sociale, Rama u ndal te nisma për amnistinë fiskale ku emigrantët mund të deklarojnë paranë e vënë nga puna në të zezë, ndërsa theksoi se do të bëhet shumë shpejt realitet.
“Jam i vetëdijshëm që lehtësimi i bërë për bizneset është i madh. Po punojmë me ekspertizë ndërkombëtare, pasi jam i bindur se njerëzve si ti, që janë dhjetra mijëra që kanë kursyer në emigracion dhe për më tepër ata që kthehen në Shqipëri, duhet t’u japim mundësinë për amnistinë fiskale. Durim, pasi punët e mira duan mundim. Ki besim, se më shpejt se vonë edhe këtë instrument do ta kesh gati”, iu përgjigj Rama një prej emigrantëve.
Qeveria është tërhequr përkohësisht nga nisma që dërgoi në parlament për amnisti fiskale dhe penale për të gjithë ata që do të deklarojnë në banka të ardhurat e padeklaruara.
Më parë Rama kishte deklaruar se drafti do të miratohej, ndërsa pati kundërshti nga opozita por edhe institucionet ndërkombëtare financiare. Mesa duket presioni i shtuar ndërkombëtar ka detyruar Kryeministrin të tërhiqet nga një miratim i shpejtë i amnistisë fiskale.
