Një 50-vjeçar, në kërkim ndërkombëtar nga autoritet për një vrasje të ndodhur në Tiranë në vitin 1998, është arrestuar në Lamia të Greqisë.
“Në kuadër të bashkëpunimit mes Zyrës Qendrore Kombëtare Interpol Tirana dhe Interpol Athinës, pas shkëmbimeve të vazhdueshme të informacioneve të grumbulluara nga Departamenti i Policisë Kriminale për vendndodhjen e një të kërkuari për vrasje, i cili fshihej në territorin grek, ditën e djeshme Policia greke, ka finalizuar kapjen dhe arrestimin e shtetasit shqiptar, me qëllim ekstradimin e tij drejt vendit tonë, konkretisht shtetasin Arben Muça, 50 vjeç, banues në Tiranë”, njoftoi policia.
Ky shtetas, në vitin 1998, ka vrarë me armë zjarri shtetasin M.T., në afërsi të një bilardoje, në rrugën “Kelmendi” – Kombinat.
Gjykata e Rrethit Gjyqësor Tiranë e ka dënuar me 23 vjet burg, për veprat penale “Vrasja me paramendim” e kryer në bashkëpunim dhe “Armëmbajtja pa leje”.
Zyra Qendrore Kombëtare Interpol Tirana po vijon procedurat e mëtejshme për ekstradimin e 50-vjeçarit Arben Muça drejt vendit tonë, njoftoi policia.
