Të tjera detaje të reja raportohen nga aksidenti në Fushë-Krujë, ku një person humbi jetën dhe një tjetër u plagos. Burime policore thanë se mjeti “Audi” me të cilin po udhëtonin dy të rinjtë rezultonte i vjedhur në Laç.
Ndërkohë, nga kontrolli, policia ka gjetur targa, maska dhe disa doza me drogë, shtuan të njëjtat burime.
Aksidenti
Sipas policisë, aksidenti ndodhi në orët e para të mëngjesit të sotëm rreth orës 06:30, në rrugën Fushë Krujë-Kurbin, në Borizanë.
Në njoftimin zyrtar, policia tha se drejtuesi i “Audi” humbi kontrollin e mjetit duke u përplasur me bordurën anësore të rrugës. Për pasojë ka ndërruar jetë pasagjeri në mjet rreth 26 vjeç, ndërsa drejtuesi i mjetit është dërguar në spital nën kujdesin e mjekëve.
