Saida Dollani dhe Dhimitër Lara, dy gjyqtarët e Apelit të Posaçëm, nuk kanë mundur të fitojnë të drejtën për t’u bërë pjesë e Gjykatës së Lartë në sektorin administrativ dhe atij civil.
Dy gjyqtarëve të Posaçëm, më herët KLGJ, kishte vendosur për t’i mos përfshirë në ngritjen në detyrë në Gjykatën e Lartë, lidhur me vendet e shpallura vakante në sektorin e së drejtës civile, administrative dhe penale.
Pas këtij vendimi të dhënë nga KLGJ, Dollani, që aktualisht është gjyqtare pranë Apelit të Posaçëm dhe Lara gjithashtu në të njëjtin pozicion, bënë padi në Gjykatën Administrative ndaj Këshillit të Lartë Gjyqësor.
Pas shqyrtimit të çështjeve, Apeli Administrativ ka vendosur rrëzimin e padive të bëra nga dy gjyqtarët. Objekti i padisë ishte: “Shfuqizimi i vendimit 268, datë 07.08.2020 të Këshillit të Lartë Gjyqësor, që ka vendosur mospërfshirjen e z.Dhimitër Lara në listën e kandidatëve për ngritjen në detyrë në Gjykatën e Lartë, për dy pozicione të lira në fushën e së drejtës administrative, për një pozicion të lirë në fushën e së drejtës civile dhe për katër pozicione të lira në fushën e së drejtës penale”. Ndërsa në vendimin e Apelit Administrativ thuhet:
“Rrëzimin e padisë. Kundër këtij vendimi lejohet rekurs në Kolegjin Administrativ të Gjykatës së Lartë brenda 30 ditëve. Vendimi u shpall më datë 30/09/ 2020”. Ndërkohë, theksojmë që dy paditë e bëra nga Dhimitër Lara dhe Saida Dollani, kishin penguar punën e KLGJ për të vijuar me plotësimin e vendeve vakante në Gjykatën e Lartë. Dollani dhe Lara janë skualifikuar nga gara për të qenë gjyqtar administrativ dhe civil.
MIJËRA DOSJE NË PRITJE TË SHQYRTIMIT
Mbi 35 mijë rekurse janë në pritje për t’u shqyrtuar nga Gjykata e Lartë. Por mbartja e një numri kaq të madh çështjesh ka ardhur si pasojë e një rritjeje graduale, për shkak se në 10 vitet e fundit Gjykata e Lartë nuk ka arritur të trajtojë dhe të zgjidhë gjatë secilit vit kalendarik çështjet që paraqiteshin.
Procesi i vetingut e rëndoi edhe më tej situatën me çështjet e mbartura nga viti në vit. Por, pavarësisht nga bllokimi i plotë i punës, gati 3500 çështje gjyqësore janë përgatitur dhe bërë gati për shqyrtim. Pak muaj më parë, Gjykata e Lartë deklaroi se Këshilli i Përgjithshëm i Gjyqtarëve vendosi që të nisë menjëherë shqyrtimin e rekurseve të çështjeve të themelit dhe çështjeve të tjera që duhet të shqyrtohen në mënyrë të shpejtë. Pas fillimit të ushtrimit të detyrës së gjyqtarëve të rinj, Sokol Sadushaj, Ervin Pupe dhe Ilir Panda, është bërë i mundur funksionimi i pjesshëm i Gjykatës së Lartë, e bllokuar prej më shumë se një viti për shkak të shkarkimeve masive nga vetingu.
“Përballë numrit të jashtëzakonshëm dhe kohës së gjatë të çështjeve në pritje për t’u shqyrtuar dhe në respektim edhe të kritereve ligjore për gjykimin e tyre, Mbledhja e Përgjithshme e Gjyqtarëve vlerësoi se do të vijohet menjëherë me shqyrtimin e rekurseve të çështjeve të themelit, nisur nga kriteri i kohës së paraqitjes së tyre për shqyrtim në Gjykatën e Lartë, krahas çështjeve të tjera që për nga natyra e tyre dhe sipas ligjit duhet të shqyrtohen në mënyrë të shpejtë, sikurse janë mosmarrëveshjet për juridiksionin, kompetencën, kërkesat për pezullimin e ekzekutimit të vendimeve”, thuhet në njoftimin e Gjykatës së Lartë. /Panorama/
