Një 40-vjeçar është arrestuar mesditën e sotme nga Policia e Tiranës, pasi vodhi dje makinën e kushërirës së tij dhe tentoi ta digjte.
Bëhet fjalë për të identifikuarin me inicialet A.GJ., banues në Kamzë.
Sipas njoftimit policor, 40-vjeçari u kap në flagrancë teksa tentonte të digjte makinën me benzinë. Automjeti u sekuestrua në cilësinë e provës materiale, për veprime të mëtejshme hetimore.
Ndërsa gjatë kontrollit të banesës së A.GJ., Policia gjeti dhe sekuestroi një armë zjarri pistoletë dhe municion luftarak.
Ndaj 40-vjeçarit rëndojnë tashmë akuza për veprat penale “Vjedhja” dhe “Armëmbajtja pa leje”.
Njoftimi i Policisë:
Kombinat, Tiranë
Vodhi automjetin e kushërirës së tij, kapet dhe prangoset nga shërbimet e Komisariatit të Policisë Nr. 6, në tentativë për ta djegur automjetin. Gjatë kontrollit të banesës së këtij shtetasit, Policia gjeti dhe sekuestroi një armë zjarri pistoletë dhe municion luftarak.
Shërbimet e Komisariatit të Policisë Nr. 6, me marrjen e njoftimit se në vendin e quajtur “Casa Italia”, rreth orës 17:30 të pasdites së djeshme, në një parkim ishte vjedhur automjeti në pronësi të shtetases B. Gj., bazuar dhe në pamjet filmike, menjeherë organizuan punën për kapjen e autorit dhe dokumentimin e plotë të ngjarjes.
Si rezultat e veprimeve të shpejta dhe profesionale, pas disa orësh kërkimesh u bë kapja dhe arrestimi në flagrancë i shtetasit A. Gj., 40 vjeç, banues në Kamzë.
Ky shtetas u kap në tentativë për ta djegur mjetin, pasi e kishte lyer me lëndë djegëse (benzinë), por falë ndërhyrjes së shpejtë dhe në kohë të shërbimeve të Policisë u bë i mundur parandalimi i djegies së mjetit.
Në cilësinë e provës materiale u sekuestrua automjeti, për veprime të mëtejshme hetimore. Materialet i kaluan Prokurorisë së Rrethit Gjyqësor Tiranë, për veprat penale “Vjedhja” dhe “Armëmbajtja pa leje”.
