Kryeministri Edi Rama ka reaguar sërisht ndaj Presidentit, Ilir Meta, pasi Zëdhënësi i tij, Tedi Blushi, i kërkoi respektimin e marrëveshjes së 5 qershorit.
Rama dhe Meta janë përfshirë në debate dhe akuza në distancë mes tyre prej disa javësh, ndërsa sot Kryeministri paralajmëroi se humbësi më i madh nga zgjedhjet e 25 prillit do të jetë Presidenti, i cili sipas Ramës, është zhveshur nga kostumi i Kreut të Shtetit, dhe është vendosur në krye të shtabit të shpk-së, sikundër ai cilësoi LSI.
“Ilir aman të keqen thuaja shqiptarëve çfarë borxhi të kanë ty që t’i dhanë të gjitha siç nuk ia kanë dhënë askujt në historinë e shtetit të tyre dhe prapë nuk ngopesh dhe nuk pushon së ngatërruari dynjanë në Shqipëri e matanë?!
Thuaja pash Zotin çfarë borxhi të kanë akoma!”, shkruan Rama në reagimin e tij.
Reagimi i Ramës ka ardhur pasi më parë, Blushi u shpreh se më 25 prill, shqiptarët do të largojnë sektin dhe bandën e Kryeministrit nga qeverisja.
