Ndriçimi Led është në gjendje që të inaktivizojë bakteret dhe viruset, përfshirë edhe Sars-CoV-2. Ky është përfundimi që ka dalë nga testet laboratorike të mikrobiologjisë dhe virologjisë në Universitetin e Sienës.
Rezultati u mor në bashkëpunim me EmoLED, një kompani e re italiane e pajisjeve mjekësore. “Kemi përdorur dritën blu Led në dendësi të ndryshme të fuqisë, me kohë të ndryshme, kundër disa viruseve të frymëmarrjes, në mënyrë që të vendosim parametrat e nevojshëm për të verifikuar aktivitetin virucid të kësaj drite”, ka zbuluar Maria Grazia Cusi, profesoreshë e Mikrobiologjisë dhe Mikrobiologjisë Klinike në Universitetin e Sienës.
Ajo shton se pasi panë aktivitetin virucid të kësaj drite, vendosën që të verifikonin efektin e saj edhe në Sars-CoV-2.
“Kemi përdorur të njëjtën gjatësi vale për 15 dhe 30 minuta, në një përqendrim të lartë të virusit (Sars-CoV-2) dhe pas ekspozimit ndaj dritës blu Led, materiali u mblodh dhe iu nënshtrua titrimit viral, domethënë u llogarit sasia e virusit të gjallë prezent pas trajtimit me këtë dritë”, tha Maria Grazia.
Kjo e fundit shton se ajo që vunë re ishte se ka patur një reduktim total të sasisë virale në materialin e trajtuar në dritën blu të Led, si në 15 dhe 30 minuta.
