Detaje janë bërë me dije nga policia lidhur me konfliktin e ndodhur në një lokal gjatë natës në Elbasan.
Burime zyrtare sqaruan se dy vetë u arrestuar, ndërsa dy të tjerë u shpallën në kërkim, pasi nën efektin e pijeve alkoolike, prishën qetësinë publike si dhe dëmtuan ambientin e lokalit.
“Shërbimet e Policisë Elbasan, pas marrjes së njoftimit për një konflikt mes klientëve dhe personelit të shërbimit të lokalit, menjëherë kanë shkuar në vendngjarje për parandalimin e përshkallëzimit të mëtejshëm të konfliktit.
Nga tërësia e veprimeve hetimore rezultoi se shtetasit Xh.T., A.M., dhe L.Q., nën efektin e pijeve alkoolike, për motive të dobëta janë konfliktuar me personelin e shërbimit të këtij lokali si dhe kanë dëmtuar tavolinat dhe banakun e lokalit, ku për pasojë është dëmtuar lehtë gjatë thyerjes së sendeve dhe orendive njëri prej klientëve që nisi konfliktin, shtetasi A.M..
Gjatë kontrollit fizik të ushtruar nga shërbimet e Policisë shtetasit A.M., ju gjet një dozë lëndë narkotike dhe në banesën e shtetasit J.Ç., të cilën e kishte me qira, janë gjetur dhe sekuestruar në cilësinë e provës materiale dhe 16 doza lëndë narkotike si edhe një shkop druri me disa vida druri metalike i përshtatur si armë e ftohtë.
Në përfundim të veprimeve hetimore nga specialistët për Hetimin e Narkotikëve dhe Trafiqeve të Paligjshme në DVP Elbasan arrestuan në flagrancë shtetasit:
- Xh.T., 24 vjeç, banues në Elbasan, për veprat penale ‘Shkatërrim i pronës private’ dhe ‘Prishja e qetësisë publike’.
- A.M., 24 vjeç, banues në Elbasan, për veprat penale, ‘Prodhimi dhe shitja e lëndëve narkotike’, ‘Shkatërrim i pronës private’ dhe ‘Prishja e qetësisë publike’.
U shpallën në kërkim policor dhe po punohet për kapjen e shtetasve: J.Ç., 24 vjeç, banues në fshatin Xhyrë, Librazhd, dhe L.Q., 43 vjeç, banues në Elbasan., të cilët në momentin që kanë parë shërbimet e Policisë kanë mundur të largohen.
Materialet hetimore i kaluan Prokurorisë pranë Gjykatës së Shkallës Parë Elbasan, për veprime të mëtejshme procedurale”, thuhet në njoftimin e policisë.
