Partizani zhvilloi ditën e djeshme miqësoren e radhës. Duke parë që kampionati në Shqipëri nuk ka filluar ende për shkak të bojkotit skuadrat shqiptare kanë zhvilluar teste miqësore për të mbajtur në formë futbollistët.
Të kuqtë e drejtuar nga Ilir Daja barazuan pa gola ndaj Lushnjes duke treguar edhe njëherë tjetër se nuk do ta kenë të lehtë në kampionat duke parë ishin të bllokuar nga FIFA për të bërë merkato. Pas ndeshjes trajneri Daja u shpreh për “RTSH Sport”, se skuadra e tij ka vështirësi për krijimin e 11-shes titullare dhe kjo ndalesë i shërben për mirë Partizanit.
“Është një situatë e pazakontë ku na vështirëson edhe për programimin e javës stërvitore sepse në fund fare duke qenë se nuk kemi një datë të saktë për fillimin e kampionatit dhe nuk kemi një orientim se çfarë duhet të bëjmë gjatë javës. Kjo ndërprerje na ka bërë mirë në planin sportive pasi për të tjerat janë drejtuesit ata që mund të merren më shumë me situatën.
Në aspektin teknik ndalesa na ka bërë mirë pasi kemi shumë probleme dhe akoma nuk kemi konsoliduar veprimet si në fazën sulmuese dhe në atë mbrojtëse. Kjo e bën të vështirë pasi nuk i kemi të gjithë lojtarët të gatshëm dhe ne mbrojtje kemi mungesa dhe po punojmë që këta futbollistë të mos kenë shumë probleme.
Problem nuk është vetëm startimi pasi kampionati është i gjatë dhe problem mbetet vazhdimësia dhe kemi vështirësi edhe në konsolidimin e 11-shes së parë pasi kemi ndarje jo të drejtë të ndarjeve nëpër reparte”, u shpreh ndër të tjera Ilir Daja.
