Kryeministri Edi Rama hodhi akuza ndaj Bashkimit Europian gjatë fjalës së tij në mbledhjen e përbashkët të dy qeverive. Rama tha se është faji i Bashkimit Europian që Kosovës nuk i janë liberalizuar ende vizat dhe Shqipërisë nuk i janë hapur negociatat me BE-në.
“Mosliberalizimi i vizave për Kosovësn turp për BE, turp i pashlyer, sepse jo se Kosova nuk ka bërë detyrën por sepse Kosova është marrë peng dinamikave të brendshme të vendeve të BE. Kosova është marrë peng i logjikës elektorale në vende të ndryshme të BE dhe Kosova duhet të presë si të mbarojnë zgjedhjet në një vend, ku janë zgjedhjet në një vend tjetër. As sot nuk arrij të kuptojë ato që thonë. Kosova e paguan me mosliberalizim vizash ne dhe Maqedonia e Veriut e paguajmë me sajesa pas sajesash dhe rajoni e paguan në tërësi. Kjo është arsyeja pse unë jam i bindur se bashkëpunimi rajonal është një valvulë e rëndësishme shkarkimi sa i përket presionit të madh ndaj tregjeve shumë të vogla për ndarjen e njëri-tjetrin. Zgjerimi i tregjeve në rajon nuk sjell gjë, por më shumë mundësi punësimi dhe paqe si dhe njohjen e Kosovës nga Serbia”, tha ndër të tjera Rama.
