Presidenti Ilir Meta ka humbur një mik besnik dhe zemërmirë. Kreu i shtetit njofton përmes një statusi në Facebook, ndarjen nga jeta të Hekuran Dokos, i cili edhe pse mposhti koronavirusin, “nuk arriti t’i mundë pasojat që i la.”
“Ndaj dhimbjen për humbjen e një miku besnik e zemërmirë, Hekuran Dokos, i cili edhe pse arriti ta largojë virusin nga trupi i tij nuk arriti t’i mundë pasojat që i la.
Hekurani ishte një bashkëpunëtor në kohë të vështira, i palëvizur në bindjet e tij. Ai kurrë nuk kërkoi të përfitonte nga miqësia jonë, përkundrazi la vend në zemrën e miqve të tij nga karakteri që kishte, integriteti dhe vlerat e larta njerëzore. U prehsh në paqe miku ynë Hekuran Doko!”, shkruan kreu i shtetit.
Meta bën edhe një apel për qytetarët dhe institucionet.
“COVID-19 vazhdon të jetë rrezik e kërcënim për jetët tona. Është e rëndësishme për secilin të tregojë kujdes personal duke respektuar të gjithë masat e këshilluara nga ekspertët dhe të lehtësojmë punën e mjekëve e personelit shëndetësor në këtë betejë të gjatë e të vështirë. Njëkohësisht edhe institucionet shtetërore duhet të tregojnë më tepër përgjegjshmëri.”, shkruan presidenti Meta.
