Përditësuar/ Gjykata e Posaçme e Apelit la në fuqi vendimin për masën e sigurisë arrest me burg për gjyqtaren Mimoza Markgjeka. Ajo akuzohet se ka marrë ryshfet për zbutjen e masës ndaj një të burgosuri dhe lirimin e tij nga qelia.
Pas seancës, Gjyqtarja me tone rebelimi tha se po jetojmë në një vend ku shteti dhe mafia janë 1. Ajo u përplas verbalisht me efektivët e policisë që e shoqëronin pasi këta të fundit i kërkuan të ndërpriste prononcimin për gazetarët.
Margjeka artikuloi dhe një herë akuzat se po goditet për vendimin e dhënë për mosnjohjen e votimeve të 30 qershorit.
“I dola përballë me një vendim të drejtë për njerëzit jo për politikën. Aty është një vend me mafia, me banda e kriminalitet. Le të varroset familja ime. Nuk e meritonin mandatin ishte mashtrim. Ku do e çoni këtë vend me këtë paturpësi. Këtu shteti dhe mafia janë 1. Bëhet fjalë për mos dhënien e mandatit të bashkisë së Durrësit”, tha ajo mes të tjerash.
Edhe avokatët i mëshuan qëndrimit se nuk ka prova ndaj gjyqtares.
***
Akuzohet për korrupsion/ Gjyqtarja Margjeka kërkon heqjen e masës: Po goditem për vendimin e dhënë për ‘30 Qershorin’
Gjyqtarja Mimoza Margjeka është shprehur se po akuzohet pa prova në procesin që po zhvillet ndaj. Ajo tha se po goditet për vendimin e dhënë kur ishte pjesë e Gjykatës së Durrësit, që shpalli nul votimet e 30 qershorit.
Margjeka u paraqit këtë të Enjte në Apelin e Gjykatës së Posaçme. Në një prononcim për gazetarët para seancës, ajo sqaroi se do kërkojë heqjen e masës që rëndon ndaj saj, pasi siç u shpreh, po akuzohet pa prova.
“Do kërkoj shfuqizimin e gjithë urdhrave. Është absurditet. Kam dosjen, e mora dje me shumë vështirësi. S’ka asnjë provë, është absurde, është thashetheme, është një… nuk e di çfarë të them”, tha Margjeka.
Ajo shtoi se “do doja të monitorohet procesi nga gazetarët”.
“Do ta kërkojë në sallë, sepse nuk lejohet për shkak të koronës, thonë. Se gjyqi u bë publik, ndërsa në sallë s’ka asnjë provë. Gjyqi do jetë në sallë me dyer të mbyllura. Nuk dua dyer të mbyllura, e dua të jetë publik. Të nxjerrin një foni aty nëse për shkak të koronës nuk lejohet… Le të futen gazetarët duke qenë se për tre ditë u trumbetua gjyqtarja e korruptuar mori 6 mijë euro, liroi trafikantin. Janë fjalë propagandistike. S’mund ti thojë SPAK-u këto. Gazetarët thotë kemi informacion nga SPAK-u. Këto janë fjalë propagandistike, të përgatitura me qëllim që të goditen persona. Unë dosjen e lexova dhe jam e çuditur. Kanë goditur reputacionin tim. Kam 30 vjet në gjyqësor. Kam katër diploma, kam punuar për këtë punë, kam dy fëmijë..”
Pse të kanë goditur?
“Unë dyshoj se është tendencë”.
Për çfarë?
“Po tani, nëse dikujt i del përballë do të godasi…”
Çfarë vendimi keni dhënë që ju që të kanë goditur?
“Ju e dini shumë mirë ca vendimi kam dhënë. Jam i vetmi gjyqtar që s’kam dhënë mandatin një bashkie, se kam thënë është nul. Është absurd, është një zgjedhje që nuk ishin zgjedhje ato. Mendova që do ta bënin dhe gjyqtarët e tjerë. Po të ishin dhe gjyqtarët e tjerë si unë, askush nuk i çonte në burg familjarisht. Nuk ka prova, është absurditet. Do ta shikoni, do ta lexoni, dosjen e kam, nuk na lejohet ta publikojmë, fjalët do i themi, goja nuk ndalon”.
AKUZAT
Muajin e kaluar, Margjeka u paraqit në Gjykatën e Posaçme, që la në fuqi masën “arrest në shtëpi ndaj saj”.
Gjyqtarja akuzohet për korrupsion. Në një njoftim zyrtar, SPAK sqaronte se bashkëshorti i gjyqtares së Korçës ka marrë ryshfet një shumë prej 6 mijë euro që Margjeka të ndryshonte një vendim për masë sigurie.
Referuar SPAK: Shuma e parave është marrë për ndryshimin e masës së sigurisë për Orion Balin, i arrestuar në Pogradec, pasi po transportonte emigrantë të paligjshëm. Gjyqtarja e Apelit në Korçë, Mimoza Margjeka, ka ndryshuar masën e sigurisë nga arrest me burg, në garanci pasurore, menjëherë sapo bashkëshorti i saj ka marrë shumën prej 6 mijë euro, nga avokati i Orion Balit, Skënder Demiraj. Shuma e parave iu pagua bashkëshortit të gjyqtares nga Nejton Bali dhe Klaudjo Zhilla, të afërm të Orion Balit.
Gjykata ka vendosur që Mimoza Margjeka, gjyqtare e Apelit në Korçë, të qëndrojë në masën e sigurisë arrest shtëpie, ndërsa për bashkëshortin e saj Arben Cara, arrest me burg. Edhe për avokatin Skënder Demiraj është dhënë masa arrest shtëpie. Nejton Bali dhe Klaudio Zhilla janë lënë po ashtu nën masën e arrestit me burg.
Mimoza Margjeka është gjyqtarja që nuk pranoi të certifikonte mandatin e kryetares së Bashkisë së Durrësit, Valbona Sako, të dalë nga votimet e 30 Qershorit. Në atë kohë, Mimoza Margjeka e argumentonte vendimin, se partia Bindja Demokratike ishte regjistruar përtej afateve ligjore dhe për pasojë fleta e votimit, ku ndodhej edhe kandidatja e Partisë Bindja Demokratike, ishte e pavlefshme. Vendimi i saj u rrëzua në atë kohë brenda 48 orësh, nga e njëjta gjykatë.
