Real Madrid ka marrë fitoren e parë në kampionat pas barazimit një javë më parë në transfertën baske ndaj Real Sociedadit.
“Los Blancos” ia dolën të triumfojnë me shifrat 2-3 në transfertën andaluziane ndaj Real Betis.
Trajneri Zidane befasoi jo pak me zgjedhjet e tij, pasi kishte vendosur të luante me dy “pyka”, ku në krah të francezit Karim Benzema luante edhe serbi Luka Jovic, ndërsa golin e avantazhit e shënoi Valverde në minutën e 14’ të takimit.
Reagimi i bardh-jeshilëve andaluzianë ishte mjaft i mirë dhe Mandi e Carvahlo shënuan në minutat 35’ dhe 37’ për të përmbysur avantazhin e madrilenëve dhe shkuar në dhomat e zhveshjes me rezultatin 2-1.
Megjithatë Reali gjeti golin e barazimit vetëm pak pas startit të pjesës së dytë, kur Emerson shënoi në portën e tij, ndërsa në minutën e 60’ i njëjti futbollist u ndëshkua me karton të kuq dhe la Betisin me një lojtar më pak.
Madrilenët shfrytëzuan në maksimum epërsinë numerike dhe nisën të sulmojnë vazhdimisht për të gjetur golin e fitores, që erdhi në minutën e 82-të dhe u shënua nga i zakonshmi Sergio Ramos nga pika e penalltisë.
Një tre pikësh mjaft i vështirë por me shumë vlera i Real Madrid që këtë sezon do të kërkojnë të mbrojnë titullin kampion.
